Heim Beint á efnisyfirlit síðunnar

Starf Garðalundar 2017-2018 

Dagskrá félagsstarfsins í Garðalundi hefst formlega miðvikudaginn 9. september með opnu húsi.  Skipulag dagskrár verður í höndum nemenda í félagsmálafræði og starfsmanna Garðalundar.  Kvölddstarfið er ætlað nemendum í 8. til 10. bekk.  Dagskráin er jafnan auglýst á heimasíðu Garðalundar, www.gardalundur.is  og á fésbók nemendafélagsins, www.facebook.com/gardalundur. Stærri viðburðir sem hafa áhrif á skólastarf nemenda eru settir inn á skóladagatal þegar ákvörðun um skipulag liggur fyrir. Í nokkrum tilvikum fá forráðamenn póst þegar mikið liggur undir. Daglega er auglýsingum varpað á skjá í matsal eða þær birtar með öðrum hættti og ættu ekki að fara framhjá nemendum í dagsins önn.

 
Opið verður með hefðbundnum hætti þrjú kvöld í viku, mánudaga og miðvikudaga frá kl. 19 til 22 og föstudaga frá kl. 19 til 22.30. Í boði verður fjölbreytt dagskrá nemenda og starfsmanna,  spil, leiktæki, leikir, stutt námskeið og hópastarf sem rúmast á opnunartíma. Dansleikir og stærri viðburðir eru oftast á föstudögum og í einhverjum tilfellum fram undir miðnætti. Rúta verður í boði félagsmiðstöðvar eftir dansleiki og ekur um helstu hverfi bæjarins.  Stundum flyst dagskrá úr húsi vegna ferða eða Samfésviðburða eða í annarri samvinnu við félagsmiðstöðvar og skóla. Húsinu er þá lokað á meðan.

Miðað er við að þrír dansleikir séu á önn og standa frá kl. 20 til 23.30. 
Opnunardansleikur er föstudaginn 25. september að loknum samræmdum prófum í 10. bekk. 
Rétt er að geta þess að forráðamenn nemenda þurfa að samþykkja það ætli börn þeirra að bjóða vinum og jafnöldrum úr öðrum skólum á skemmtanir. Forráðamenn geta sent okkur upplýsingar á gardalundur@gardalundur.is

Stærri viðburðir í vetur aðrir en böll verða Afmæli skólans, Gagn og gaman dagar, Draugahús, Söngkeppni Samfés og Stílkeppni Samfés, hæfileikakeppnin Safinn, Samféshátíð, leikuppfærsla, árshátíð og skíðaferðir svo eitthvað sé nefnt. Lögð verður áhersla á að hafa öðru hverju dagskrá í hádegi og frímínútum í vetur með ýmsum kynningum, sýningum, tónlist og léttu gamni til að hressa upp á andann á skólatíma og í félagsmiðstöð.

Félagsmálafræði er áfram í boði sem valgrein fyrir nemendur í 9. og 10. bekk sem hafa brennandi áhuga á félagsmálum. Stór hópur sótti um en ekki komast allir að sem vilja. Nemendahópurinn sem var valinn tekur til starfa strax í lok ágúst.  Markmiðið er  að félagsmálafræðihópurinn skipuleggi  og framkvæmi sem mest í  félagslífi vetrarins og njóti til þess stuðnings og reynslu starfsmanna. Ef allt gengur að óskum ætti viðburðadagatal annarinnar að líta dagsins ljós í byrjun september.

Þess má geta að margir hafa í gegnum tíðina öðlast dýrmæta reynslu við að undirbúa, framkvæma og stjórna viðburðum og okkar nemendur verið áberandi og öflugir í félagslífi framhaldsskólanna gegnum árin. Af því erum við stolt og vonum að framhald verði á.
Áherslur  í vetur verða á að efla innihald tómstundastarfsins, almenna listsköpun, kvikmyndagerð,  leiklist, tónlist og  hljómsveitastarf.  Áhugasamir eru beðnir um að hafa samband á skrifstofu Garðalundar. Hægt er að fá æfingatíma í tónmenntastofu á kvöldin með eða án leiðsagnar. Einnig gefst kostur á að nýta tónlistaraðstöðu og upptökuver á skólatíma í samráði við stjórnendur. Nemendur er hvattir til að nýta sér þessa opnu möguleika.

Áfram verður haldið á þeirri leið að bæta hugmyndafræði félagslífsins, tækjakost, búnað og alla aðstöðu. Góð þátttaka og samstaða nemenda gegnum árin hefur gert félagslíf skólans og nemendafélagið  eitt það öflugasta og farsælasta á landinu og gert nemendum mögulegt að takast á við afar stór, flókin og skemmtileg verkefni.   

Nýtum tækifærin og njótum okkar vel í vetur. Hlökkum til að sjá þig!
Starfsfólk Garðalundar.

Beinn sími félagsmiðstöðvar er 5902575 og netfang gardalundur@gardalundur.is 
Gunnar  gunnar@gardalundur.is ,sími 5902570
Brynhildur brynhildur@gardalundur.is, sími 5902575
 


 
English
Hafðu samband